Jedeen Spraak hett Bestimmen (ndt.: Bestimmungen), woans wat schreven, schnackt un utdrückt warrn schall. Dat gellt för Böker, Texten (lütte oder groote) in dat Internet jüst so as in´t Radio un op Werbeplakate överall in de Stadt. Un eegens schall dat ook för Straatenschiller gellen, de an´n Ingang to een Dörp oder een Gemeende staht.
Nu steiht awer al siet över 25 Johren an een Nevenstraat in Bullenkuhlen een Oortsschild, dat Een/e sick tweemol ankieken mutt: Bullenkuhlen. Kreis Pinnberg.
Jo, – watt denn nu? Kreis Pinnberg oder Kreis Pinnebarg oder Kreis Pinnbarg?
Vörslag: Laat Pinneberg man Pinneberg blieven. Un wenn dat afsluuts (ndt.: absolut) op Platt schreven warrn schall: Pinnbarg!
Wat awer gor nich geiht (un afsluuts unkorrekt weer), weer: Nich Kreis sünnern Krink to schrieven. De Plattdüütsche nöömt Krink, wenn dat üm Singen geiht (Leederkrink), üm Stricken (Knüttenkrink) oder üm Plattdüütschschnacken (Plattdüütschkrink). Awer een Kreis blifft een Kreis, wenn dat een Kreis is as geometrische Figur. Un dat gellt ook för een Kreis Pinneberg, een slaten (ndt.: geschlossener) Kreis vun Dörper un Gemeenden.
So as Bullenkuhlen in´n Kreis Pinneberg!