De oole Schnack hüng ook mol an dat Füerwehrhuus an de Marktstraat in Barmstedt – man domols blots op Hochdüütsch: Wenn Füer weer un dat geev keen Füerwehr – wat meenst du, wat för Füer weer!
Nu is dat een goden Tofall, dat sick dat hochdüütsche wär (as een Konjunktiv II vun dat Hölpsverb sein in de drütte Person Singular) mit dat nedderdüütsche weer (ook een Konjunktiv II) riemeln deiht. Un riemeln steiht för reimen. Steiht hier as een Infinitiv, dat is de Grundform vun een Verb.
Kiek an: Ook in de nedderdüütsche Spraak – allgemeen Plattdüütsch nöömt (dat is een Partizip vun nömen (ndt.: nennen) – gifft dat sowat as Grammatik. Dat is ut dat Griechische un meent: Kunst des Schreibens. Op Platt: Dat Schrieven so to maken, as de Spraak opbuut (ndt.: gebaut) is.
Awer trüüch to den oolen Schnack över de Füerwehr. De is jüst so wohr in düsse Tiet as vör hunnertföfftig Johren un jüst so wohr op Platt as op Hochdüütsch. Un wat de Füerwehr un all de Füerwehrkameraden so maakt hebbt un jümmers noch maakt, dat kann Een/e sick in dat Museum op de Barmstedter Schlossinsel in een Utstillen ankieken. Denn de Füerwehr in Barmstedt fiert Jubiläum: Feuer! 150 Jahre Freiwillige Feuerwehr Barmstedt. De Utstillen geiht noch bit to´n letzten Dag vun´t Johr: Silvester, 31.Dezembermaand 2025.