För dat Utteken, dat dat Museum vun de Graafschop Rantzau in´n Maimaand 2023 vun de Museumsberatung und -zertifizierung in Schleswig-Holstein kregen hett, hebbt de Fachlüüd vun´n Museumsverband Schleswig-Holstein e.V. ook Grünn funnen. So as de negen anneren Museen in´t Land, de mit een Zertifizierung uttekent worrn sünd, so hett de Utschuss ook för de Barmstedter Museumslüüd de Grünn nöömt: Dat Präsenteern vun de Geschicht vun de Graafschop Rantzau (de Hochdüütschen würrn seggen: Alleinstellungsmerkmal) un dat Uteenannersetten mit de nedderdüütsche Spraak jüst so as dat Lebennighalen vun de oole norddüütsche Regionalspraak, kort seggt: De Ümgang mit dat Plattdüütsche is een vun de Grünn!
Düchtig wat rutstreken hebbt de Lüüd, de sick mit Museumsarbeit utkennen doot, ook de üm un bi 120 Johr oole Niederdeutsche Bibliothek vun´n plattdüütschen Heimotvereen „Jungs holt fast“ för Barmstedt un Ümgegend vun 1904.
Jüst doran, so hebbt de Barmstedter sick bi´n Museumsverband bedankt, warrt de plattdüütsche Afdelen in´t Museum warken: an dat Uteenannersetten mit de oole norddüütsche Regionalspraak un dat Lebennighalen vun de nedderdüütsche Kultur un Literatur – sotoseggen as een Kulturschatz bewohren, denn de oole Spraak is düchtig wat öller as de hochdüütsche Spraak!

Barmstedt, 30.Junimaand 2023