Ook in dat nie Johr gifft dat in uns Sellschopp (ndt.: Gesellschaft) Wöör,
de een heel un deel groot Bedüüden hebbt: Freden op de Welt (hebbt wi in veele
Delen vun de Welt jüst nich), Tosamenholt (ndt.: Solidarität), wat de Lüüd dor,
wo heel veel Water rünnerkamen is, jüst to Wiehnachten ünner Bewies stellt
hebbt – un dat Woort Heimat.
Un jüst över dat, wat jümmers dor is, wat awer veel to veele Lüüd in de
Welt opgeven mööt, warrt veel to wenig schnackt: Heimat. Dat gifft Lüüd, de
schnackt över unsen Footballvereen SSV Rantzau vun jüm ehren Heimatvereen.
Sogor Zeitungsbläder schrievt mitünner vun een Sportvereen as vun een
Heimatvereen un meent jüst den Vereen, de in jüm ehr Stadt oder Gemeende
sien Sitten (ndt.: Sitz) hett.
Un in´n Kreis Pinnbarg gifft dat een „Archivführer für den Kreis
Pinneberg“, de alleen tominnst (ndt.: mindestens) acht Heimatvereene optellt.
Opto hebbt in een lütt Broschüür „Museen, Sammlungen und Kulturschätze im
Kreis Pinneberg“ ut dat Johr 2023 vun 34 Positschonen een godes Drüttel
Heimat in ehre Överschriften un in ehr eegen Beschrieven vun jüm ehr Hüüs.
Ook dat Museum vun de Grafschop Rantzau in Barmstedt warrt vun veele
Lüüd jümmers noch Heimatmuseum nöömt. Un blangenbi (ndt.: nebenbei)
seggt: Uns Museum is Maat (ndt.: Mitglied) in´n Kreisheimatverband un över
düssen Verband ook Maat in´n Schleswig-Holsteinischen Heimatbund (SHHB).
Een süht: Heimat överall. Düsse SHHB hett sien Sitten (ndt.: Sitz) in dat
Freilichtmuseum in Molfsee bi Kiel. Un jüst dor is noch bit 21.Julimaand een
Utstillen (ndt.: Ausstellung) ünner de Överschrift „Heimaten. Eine Ausstellung
und Umfrage“ to sehn.
Een gode Gelegenheit, sick düt Johr mol düchtig mit den oolen un to
glieke Tiet heel „frischen, aktuellen Begriff Heimat“ uteenannertosetten – un
ook in goden Sinn doröver to strieden !

Barmstedt, 12.Januarmaand 2024