Kuum to glööven: In een Indrag in dat Internet in den USA hebbt Lüüd schreven, dat dat Plattdüütsche – se nöömt dat Low German – de offizielle Spraak in Düütschland ween schall. Eernsthaftig meent!
Statistikers seggt, dat hüüttodags üm un bi dree Perzent vun de Düütschen (dat sünd üm un bi tweeunhalv Millionen Lüüd) Platt schnacken köönt. In Nordamerika süht dat anners ut: Dor hangt dat dorvun af, in welk een Deel vun dat groote Land de düütschen Utwanderers henkamen sünd. Gifft Gemeenden un groote Landsdeele, in de teihn Perzent oder ook twintig de oole norddüütsche Regionalspraak spreken köönt, gifft awer ook wiede Deele, dor is de Spraak nich mehr dor.
Awer keen Minsch in Amerika kann seggen, in Düütschland warrt offiziell Low German schnackt. Wat awer nipp un nau korrekt is: Dat Nedderdüütsche (de Spraak un de Kultur) is Deel vun de Wetenschop (ndt.: Wissenschaft) in Düütschland.
Dat hett nülichst een Utstillen in de Universität Hamborg kloor un düütlich wiest (ndt.: gezeigt): De Wetenschop vun dat Nedderdüütsche. Nu is de Utstillen al vörbi. Awer: Dat, wat dor wiest worrn is, dat kann Een/e in dat Nedderdüütsche Institut vun de Hamborger Uni nakieken.
Ook wenn de oole Spraak nich de offizielle Spraak vun Düütschland is!
Dat kannst glööven …!